4. des.- Í skóinn, Cybertruck, forsetakosningar BNA, COP 28, handbolti

Morgunútvarpið

Gallup kannaði það í nýjum Þjóðarpúlsi sem birtur var um helgina hversu algengt sé að börn fái kartöflu í skóinn fyrir óþekkt. Fjörutíu prósent foreldra sögðu að þetta hefði vissulega gerst; barn þeirra hefði fengið kartöflu í skóinn í stað gjafa en nokkur munur var á svörum eftir aldri foreldra og búsetu, og greinilega eftir stjórnmálaskoðunum. Hvernig er best að hátta þessum málum og er rétt að refsa börnum með þessum hætti? Við ræðum við foreldra- og uppeldisfræðingana Helenu Rut Sigurðardóttur og Rakel Guðbjörnsdóttur. Cybertruck, nýjasta afurð bandaríska bílaframleiðandans Tesla, var formlega settur á sölu í lok síðustu viku, en trukkurinn var kynntur með miklu myndskeiði sem tekið var upp hér á landi. Cybertruck var lengi í þróun og hefur vakið talsverða athygli fyrir nýstárlegt útlit og um tíma var deilt um það hvort hann væri hreinlega löglegur á götum Evrópu. Við ætlum að ræða við Björn Kristjánsson, bílasérfræðing og tækniráðgjafa hjá FÍB, um trukkinn og hvort líklegt þyki að Íslendingar séu til í að keyra nýjasta bíl Musk. Þó enn sé tæpt ár í að Bandaríkjamenn velji sér nýjan forseta er kapphlaupið hafið og það jafnvel fyrir nokkru síðan. Fljótlega eftir áramót hefjast forkosningar og allt bendir til þess að bandaríkjamenn muni velja á milli Trump og Biden í nóvember 2024. Hver verða helstu hitamálin og hvað gæti helst ráðið úrslitum? Silja Bára Ómarsdóttir prófessor og alþjóðastjórnmálafræðingur veltir því upp með okkur. Kristjana Arnarsdóttir, íþróttafréttakona, verður á línunni frá Stafangri þar sem HM í handbolta stendur nú yfir. Ísland mætir einmitt Angóla síðdegis í dag og við ræðum hana um stöðuna í riðlinum og hvað tekur núna við íslenska liðinu. Við höldum áfram að fylgjast með COP 28 -loftslagsráðstefnu Sameinuðu þjóðanna. Í gær tóku hálfs mánaðar gömul ummæli forseta ráðstefnunnar, Al Jaber, yfir fréttaflutning af ráðstefnunni. Að miklu leiti í það minnsta. Hann sagði engin vísindaleg gögn styðja að útfösun á jarðefnaeldsneyti færði okkur nær því að halda hlýnun undir 1.5 gráðu. Margt fleira hefur þó farið fram á ráðstefnunni sem hófst á fimmtudag. Finnur Ricart Andrason hjá Ungum umhverfissinnum fer yfir það með okkur. Lagalisti: Moses Hightower - Stundum. MOTT THE HOOPLE - All The Young Dudes. AXEL FLÓVENT - When the Sun Goes Down. BJÖRK - Afi. CHILDIS GAMBINO - Redbone. FLOTT - Flott. BRUCE SPRINGSTEEN - Dancing In The Dark. GOSI & SALÓME KATRÍN - Tilfinningar. LEON BRIDGES - Beyond. THE CURE - Boys don't cry.